समस्या हजारौं भए झेल्नु पर्छ
कतै अग्निज्वालासँगै खेल्नु पर्छ
नहाँस्नेहरू जिन्दगीभित्र रुन्छन्
सधैँ हाँस्न सक्नेहरू स्वस्थ हुन्छन् ।
निराशा नपाली सिँढी चढ्नु पर्छ
खडा वृक्ष जस्तै उँभो बढ्नु पर्छ
चले पाउ व्योमादि सम्पूर्ण छुन्छन्
सधैं हाँस्न सक्नेहरू स्वस्थ हुन्छन् ।
दियो बाल्नु राम्रो हियो चेतनाको
हिँडौं सिर्जनाको लिई दिव्य राँको
गुणी सत् कुराले तृषा मोह धुन्छ्न्
सधैँ हाँस्न सक्नेहरू स्वस्थ हुन्छन् ।
ससाना कुरामा खुसी देख्नुपर्छ
भए डाह ईर्ष्या खुदै छेक्नुपर्छ
अनासक्ति पाले सदिच्छा कुहुन्छन्
सधैँ हाँस्न सक्नेहरू स्वस्थ हुन्छन् ।
भए रोग भाग्छन् सधैँ हाँस्न सक्दा
सुखी हुन्छ मान्छे खुसी साँच्न सक्दा
वृथा पाउ तान्नेहरू द्रोह चुन्छन्
सधैँ हाँस्न सक्नेहरू स्वस्थ हुन्छन् ।
✍️ बिन्दु दहाल मूकदर्शक
दमक, झापा ।
Discussion about this post