सुन्दर चुली (कविता)

सधैँ हेरूँ हेरूँ हृदय रसिने शैल गरिमा
छँदै छैनन् यस्ता कनकसरिका विश्वभरिमा
अहो कस्ता राम्रा गिरिशिखर छन् पावन झुली
खुलेका छन् राम्रा मनमुटु छुने सुन्दर चुली ।

यिनै दिन्छन् पानी कलकल चिसो निर्मल मिठो
यिनै पार्छ्न् वर्षा झरझर सधैँ हर्दम छिटो
सबै हेर्छन् राम्रा रजत गिरि यी मानिस भुली
खुलेका छन् राम्रा मनमुटु छुने सुन्दर चुली ।

यिनै छेक्छन् हाम्रा रिपुदलहरू साँध सबमा
यिनै छर्छन् शोभा अतुल ममता लोक नभमा
यिनै नै हुन् हाम्रा शिरमुकुट या स्वस्तिक मुली
खुलेका छन् राम्रा मनमुटु छुने सुन्दर चुली ।

बिहानै टल्किन्छ्न् टलटल सधैँ उत्तर दिशा
यिनैले चिर्दै छन् तपपट सधैँ त्रासद निशा
यिनै नै हुन् हाम्री भुवनभरकी लाग्दछ ठुली
खुलेका छन् राम्रा मनमुटु छुने सुन्दर चुली ।

भरोसा हुन् हाम्रा खनिज जति जे गर्भमुनि छन्
सधैँ तान्छन् नौला मनुज सुकिला पर्यटक झन्
सबै बाँचेका छौँ हिमशिखरका आस बटुली
खुलेका छन् राम्रा मनमुटु छुने सुन्दरचुली ।