गर्मी (कविता)

बाँच्नै मुस्किल पार्छ आज कसरी गर्मी बढ्यो बेस्सरी
तातो चल्छ हवा हतास सब छौँ बाँचौं सबै के गरी ?
राती सुत्न सकिन्न तर्र पसिना आई सबै बग्दछ
यो पापी परिवेशले मनुजको अस्तित्व नै सक्दछ ।

छोड्यो रुच्न खुराक झन् उखुमले मान्छे भयौं दुर्बल
गर्मी मात्र बढ्यो जतै मुलुकमा तातो भयो झन् जल
विद्यार्थी घरमै बसे अब सबै छन् बन्द विद्यालय
तातो बाफ बढी भयौँ अधमरा बढ्दै गयो झन् भय ।

साना बाल युवा र बृद्धवय जो सारा डरायौँ अब
बाँच्ने छैन उपाय आज सजिलै गर्मी हुँदा रौरव
त्याग्यौँ ठाउँ चिसा पहाडतिरका आनन्द खोज्दै हिँड्यौं
आफैंले अहिले सुखी रहरले गर्मी मजाले भिर्‍यौँ ।

काट्यौँ वृक्षहरू सबै मनखुसी नाङ्गा भए जङ्गल
यस्तै चाल बढे अझै अशुभले गाँज्ला सबै मङ्गल
मानौं सूर्य दुई उँभो गगनमा छन् आज जस्तो भयो
हाम्रै कारणले लु चल्छ यसरी सुन्दा अनौठो छ यो ।

देखिन्नन् बटुवा चरा सगरमा बड्दै छ अन्योलता
लाँदै छौँ धरती कता सुजन हो कस्तो छ गर्मी त्यता
खाऔं ती फलफूल मिष्ठ रसिला पानी पिऔं निर्मल
गर्मी थेग्न सकिन्छ साहस गरे पाइन्छ मीठो फल ।

लेखक :- बिन्दु दहाल (मूकदर्शक)