कानेपोखरीमा अन्तर पालिका स्तरीय प्रथम अध्यक्ष कप हुने

मोरङ। मोरङको कानेपोखरी गाउँपालिकामा अन्तर पालिका स्तरीय प्रथम अध्यक्ष कप हुने भएको छ ।

शुक्रबार कानेपोखरी खेलकुद परिषद समितिले गाउँपालिकामा पत्रकार सम्मेलनको आयोजना गर्दै खेलहुने बारे जानकारी गराएको हो । खेल चैत १३ गते देखी २० गते सम्म वडा नम्बर ५ स्थित जहदाको रंगशालामा हुने कानेपोखरी खेलकुद परिषद समितिका अध्यक्ष चरण गुरुङले बताए ।

खेलमा आयोजक कानेपोखरी गाउँपालिका, पथरीशनिश्चरे नगरपालिका, बेलबारी नगरपालिका, केराबारी गाउँपालिका, लेटाङ नगरपालिका, मिक्लाजुङ गाउँपालिका, उर्लाबारी नगरपालिका र इटहरी उपमहानगरपालिका गरी जम्मा ८ वटा टिम सहभागी रहेका छन् ।

खेलको विजेता टिमले नगद १ लाख र उपविजेताले ६० हजार ट्रफी, मेडल र प्रमाण पत्र पाउने छन् । प्रत्ये खेलमा म्यान अफ द म्याच नगद १५ सय, ट्रफी र मेडल पाउने छन् । त्यसैगरी खेलको अन्तिम दिन विद्यागत पुरस्कार खेल अवधिभर उत्कृष्ट खेलाडीलाई १ जनालाई नगद ५ हजार, हाइस्कोरर, बेस्ट डिफेन्डर, बेस्ट स्ट्राइकर, बेस्ट गोलकिपर र बेस्ट कोचलाई जनही ३ हजार सहित ट्रफी र मेडल प्रदान गरिने समितिका सचिव एविन पाठकले बताए ।

उद्घाटन खेलमा मिक्लाजुङ गाउँपालिका र बेलबारी नगरपालिका विच खेल हुने भएको छ । खेलको उद्घाटन गाउँपालिका अध्यक्ष ताराबहादुर काफ्लेले गर्ने भएको छ ।