कम्युनिस्ट पार्टी (नेकपा)बाट झापा क्षेत्र नम्बर–५ का उम्मेदवार रन्जित तामाङले एमाले अध्यक्ष केपी ओलीलाई वृद्धभत्ता खाएर बस्न सल्लाह दिएका छन् । तामाङले जेनजी आन्दोलनबाट अपदस्त भएका ओलीले कांग्रेसका पूर्वसभापति शेबहादुर देउवाले जस्तै विश्राम लिनुपर्ने बताएका हुन् ।
आसन्न प्रतिनिधिसभा निर्वाचनको प्रचार अभियानका क्रममा झापा–५ को गौरादह नगरपालिका पुगेका तामाङले भने, ‘७४ वर्षीय ओलीले अब सत्तामा जाने लोभ गर्नु हुँदैन, वृद्धभत्ता खाएर बस्नुपर्छ ।
जेनजी आन्दोलनले असान्दर्भिक ठहर गरेका नेताहरु फेरि पनि निर्वाचनमा जानु विडम्वना भएको तामाङले बताए ।
तामाङले जेनजीका नाममा राजनीति गर्न खोज्नेहरुले पनि जेनजीका मुद्दा बेवारिसे पारेको आरोप लगाए । अर्को प्रसंगमा तामाङले राष्ट्रिय स्वतन्त्र पार्टीका वरिष्ठ नेता बालेन्द्र शाहले प्रत्यक्ष निर्वाचित कार्यकारीको मुद्दा छाडेको आरोप लगाए ।
मंगलबार नेकपा गौरादह नगर समितिद्वारा आयोजित भेलाले लेखतबहादुर खड्काको संयोजकत्वमा १०१ सदस्यीय निर्वाचन परिचालन समिति घोषणा गरेको मुल निर्वाचन परिचालन समितिका संयोजक सुरेन्द्र बस्नेतले जानकारी दिए ।
कार्यक्रममा नेकपाका केन्द्रीय सदस्य बस्नेत, गगन पुरी, दिपेनवाला राई, हुकुम सिह लगायतले शुभकामना दिएका थिए ।
Discussion about this post