सहकारी ठगि आरोपका अभियुक्त लामिछानेको काण्डको प्रमाण प्रहरीको हातमा,

१० मङ्सिर २०८१काठमडौ,
सहकारी ठगि आरोपित अभियुक्त राष्ट्रिय स्वतन्त्र पार्टी (रास्वपा) का सभापति रवि लामिछानेलाई हिरासतमा राख्त थप १५ दिन म्याद थपिएको छ ।

आइतबार कास्की जिल्ला अदालतका न्यायाधीश हिमलाल बेल्वासेको इजलासले लामिछानेलाई अनुसन्धानका लागि १५ दिन म्याद थपिएको हो ।

लामिछानेमाथि प्रहरीले सहकारी ठगी, संगठित अपराध र सम्पत्ति शुद्धीकरणसम्बन्धी कसूरमा अनुसन्धान गरिरहेको छ

प्रहरी हिरासतमा रहेका राष्ट्रिय स्वतन्त्र पार्टी (रास्वपा) का सभापति रवि लामिछानेमाथि अनुसन्धानका लागि कास्की जिल्ला अदालतले थप १५ दिनको म्याद दिएको हो ।

लामिछानेसँगै गोर्खा मिडिया नेटवर्कका अर्का सञ्चालक पूर्वडीआईजी छविलाल जोशी, लीला पछाईं र रामबहादुर खनाललाई पनि अदालतले १५ दिन हिरासतमा राख्न म्याद थप गरेको छ ।

पूर्वगृहमन्त्री समेत रहेका सभापति लामिछानेलाई कात्तिक २ गते रास्वपाको केन्द्रीय कार्यालय, काठमाडौंबाट पक्राउ गरेर कास्की ल्याइएको थियो ।

यसैबीच, सहकारी ठगका अभियुक्त लामिछानेले आफूलाई हिरासतबाहिर रहेर मुद्दा लड्ने व्यवस्था गरिदिन माग गरेका छन् । थुनछेकको बहसका क्रममा लामिछानेले आफू भागेर कहीं नजाने बरु सहकारीपीडितको पक्षमा लड्ने बताएका थिए ।

लामिछानेले आफू ग्यालेक्सी टेलिभिजनमा हुन्जेल कसैले पनि सहकारी ठगी प्रकरण नउठाएको दाबी गरेका थिए ।

सहकारी ठगका अभियुक्त रास्वपाका सभापति लामिछाने ३६ दिनदेखि कास्की प्रहरीको हिरासतमा छन् । लामिछानेलाई काठमाडौं र चितवनमा बयानका लागि लैजाने सम्भावना छ ।

उता, प्रहरीको अनुसन्धानका क्रममा लामिछानेले सहकारीलाई चेक काटेर दिएको फेला परेको छ लामिछानेको हस्ताक्षरसहितको चेक बुटवलको सुप्रिम र पोखराको सूर्यदर्शन सहकारी संस्थालाई बुझाएको अनुसन्धानका क्रममा भेटिएको प्रहरी स्रोतले जनाएको छ ।

रुपन्देहीको सुप्रिम सहकारीबाट पटकपटक रकम लिएको गोर्खा मिडिया प्रा.लि.ले त्यही सहकारीलाई ४० लाख ४२ हजार रुपियाँ फिर्ता गरेको चेक भेटिएको छ ।

गोर्खा मिडिया नेटवर्कमा रहँदा सहकारी संस्थाबाट लिएको ऋण र अन्य कारोबारबारे आफूलाई जानकारी नभएको दाबी गर्दै आएका लामिछानेले चेक काटेको भेटिएपछि रास्वपाभित्र खैलाबैला भएको छ ।

प्रहरीले लामिछानेविरुद्ध अन्य बलिया प्रमाणहरू पनि फेला पारेको छ । लामिछाने लामै समय थुनामा जाने सम्भावना बढेको छ । सहकारी ठगी आरोपित अभियुक्त लामिछानेलाई बचाउन रास्वपाका केही नेता र कार्यकर्ताहरूले सडकमा प्रदर्शन गरेका बेला प्रहरीको हातमा थप प्रमाणहरू परेपछि रास्वपा नेता तथा कार्यकर्ताहरु निराश बनेका छन् ।