बहुल राष्ट्र राज्य निर्माणका लागि मधेशको हुलाकी सडकदेखि पहाडी लोकमार्गसम्म एकसाथ आन्दोलन

लोकतान्त्रिक समाजवादी पार्टी (लोसपा) छाडेर राष्ट्रिय मुक्ति क्रान्ति अभियान थालेका नेता राजेन्द्र महतोले पहिचानसहित बहुल राष्ट्र राज्य निर्माणका लागि मधेशको हुलाकी सडकदेखि पहाडी लोकमार्गसम्म एकसाथ आन्दोलन गर्नुपर्ने बताएका छन् ।

शनिबार जनकपुरधाममा समान नेपालको सहयोगमा राष्ट्रिय मुक्ति क्रान्ति अभियानले आयोजना गरेको कार्यक्रममा महतोले बहुल राष्ट्र राज्य निर्माण एक मात्र उद्देश्य हुने बताए । त्यसका लागि मिल्ने शक्तिहरूसँगको सहकार्यमा नयाँ पार्टी बनाउने उनको भनाइ छ ।

अहिले बनेको नयाँ सत्ता गठबन्धन पनि पालैपालो लुट मच्चाउने समूह मात्रै रहेको उनको टिप्पणी छ । ‘१२ प्रतिशत खस शासकहरू मिलेर पालैपालो कसरी सरकारी ढुकुटी लुट्ने ? त्यति मात्रै हो । त्यसैले वर्तमानमा गठबन्धन बन्छ र भत्किन्छ,’ उनले भने ।

कार्यक्रममा बुद्धि छिरिङ तामाङले नेपालका मधेशी, आदीवासी, जनजाति, थारु र दलितसहितका पिछडिएका समुदायले कुर्सीको राजनीति गरे पनि वैचारिक राजनीति भने नगरेको आरोप लगाए । सत्ता भन्दा क्रान्तिका लागि केही वर्ष खर्च गर्नुपर्ने समय रहेको उनको भनाइ छ । हरेक समुदायको समप्रभुता स्थापनाका लागि यो क्रान्ति थालिएको भन्दै गोर्खाली सत्ता ढाल्न सबै मिल्नुको विकल्प नरहेको उनको भनाइ थियो ।

त्यस्तै सुमन शायमीले मधेशी जस्तै काठमाडौंको नेवार सामुदायको पीडा मिल्दाजुल्दा रहेकोले आफू यो अभियानमा सहभागी भएको बताए ।