कमल, ६ पौष । झापाको कमल गाउँपालिका–२, भुत्लुङ्ग स्थित ज्योति माध्यमिक विद्यालयले विहिबार आफ्नो ५७ औं वार्षिक उत्सव तथा अभिभावक दिवस मनाएको छ ।
कमल गाउँपालिका कै पहिलो बालमैत्री विद्यालय रहेको यस विद्यालयको ५७ औँ वार्षिक उत्सव तथा अभिभावक दिवस कार्यक्रमको उद्घाटन कमल गाउँपालिकाका अध्यक्ष हुकुम सिंह राईले पानसमा बत्ती बालेर गर्नु भएको थियो ।
गाउँपालिका अध्यक्ष राई र उपाध्यक्ष प्रमिला न्यौपाने (तिवारी)ले संयुक्त रुपमा विद्यालयमा निर्मित विज्ञान प्रयोगशाला कक्षको उद्घाटन गर्नुका साथै निरीक्षण समेत गर्नु भएको थियो ।
त्यस्तै कार्यक्रममा विद्यालयलाई विविध क्षेत्रबाट सहयोग गर्नुहुने महानुभावलाई नगद तथा जिन्सीद्वारा सम्मान गर्नुका साथै विद्यालयमा अध्ययनरत जेहेन्ददार विद्यार्थीहरुलाई छात्रवृत्ति तथा विद्यालयले आयोजना गरेको अतिरिक्त क्रियाकलापका उत्कृष्ट विद्यार्थीलाई पुरस्कृत गरिएको थियो ।
त्यस्तै विद्यालयका पूर्व शिक्षक, नयाँ नियुक्ति लिएर आउनुहुने शिक्षक, विद्यालयका उत्कृष्ट कर्मचारी, शिक्षक, अभिभावकहरुलाई समेत सम्मान गरिएको थियो भने विसं. २०६७ सालदेखि विसं. २०७९ सालसम्म एसएलसी तथा एसईई परीक्षामा उत्कृष्ट हुने विद्यार्थीहरुलाई समेत सम्मान गरिएको विद्यालयकी शिक्षिका पुजा श्रेष्ठले बताउनु भयो ।
त्यसैगरी कार्यक्रमकै अवसरमा विद्यालयका पूर्व शिक्षक दुर्गा बहादुर न्यौपानेलाई समेत विदाई गरिएको छ । भने कार्यक्रममा स्थानीय कलाकार नन्दु गुरुङ्ग, सिद्धान्त खड्का र बाल कलाकार रियाज रिजालको समेत प्रस्तुति रहेको थियो ।
विद्यालय व्यवस्थापन समितिका अध्यक्ष तिलक खड्काको अध्यक्षतामा सम्पन्न कार्यक्रमका विद्यालयका प्रधानाध्यापक नगेन्द्र बस्नेतले विद्यालयको वार्षिक प्रतिवेदन तथा विविध गतिविधि प्रस्तुत गर्नु भएको थियो ।
कार्यक्रममा कमल २ का वडा अध्यक्ष अशोक राई, कमल गाउँपालिकाका शिक्षा शाखा प्रमुख सूर्य न्यौपाने, वडा सदस्य, विद्यालय व्यवस्थापन समितिका पूर्वअध्यक्ष, पूर्व प्रधानाध्यापक, शिक्षक, विद्यार्थी, पूर्व विद्यार्थी, लगायतको उपस्थिति रहेको थियो ।
कार्यक्रम विद्यालयका शिक्षक रमा लामिछाने र अनुप वस्तीले सञ्चालन गर्नु भएको थियो भने सहायक प्रधानाध्यापक नारायण बस्नेतले कार्यक्रमको उद्देश्य माथि प्रकाश पार्नुका साथै शाब्दिक शब्दद्वारा स्वागत गर्नु भएको थियो ।
फोटो फिचर :
Discussion about this post