प्रदेशस्तरीय प्रथम अध्यक्ष कपको फाइनल टेम्के फुटबल क्लब धरानले जित्यो

कमल । झापाको कमल गाउँपालिकामा जारी प्रदेश स्तरीय प्रथम अध्यक्ष फुटवल कपको फाइनल धरानको टेम्के फुटवल क्लवले जितेको छ ।

सुनसरीको शसस्त्र प्रहरी पकली टीमलाई ०–१ गोलको अन्तरमा टेम्के धरान विजयी बनेको हो । खेलको ४६ औं मिनेटमा जर्सी नम्बर २० का रोमन लिम्बुले गरेको गोल नै टेम्केका लागि निर्णायक गोल बन्न सफल भयो । लिम्बु खेलको म्यान अफ द म्याच समेत घोषित हुनु भएको छ ।

खेलमा विजयी टेम्के धरानको तर्फबाट उत्कृष्ट गोल किपरमा प्रविन लिम्बु, स्टाइकरमा आकाश राई, र कोचमा जोगिन मरिक घोषित भई नगद सहित ट्रफी पुरस्कार पाएका छन् । यस्तै उपविजेता टीम शसस्त्र प्रहरीका तर्फबाट उत्कृष्ट डिफेन्स, मिड फिल्डर र खेल अवधिका उत्कृष्ट खेलाडीमा क्रमशः दिवश गिरी, शैलेन्द्र राई र रोमन भूजेल घोषित भई पुरस्कृत भएका छन् ।

खेलमा विजयी टिमले २ लाख र उपविजेता टिमले १ लाख नगद सहित ट्रफी र मेडल कमल गाऊँपालिकाकी अध्यक्ष मेनुका काफ्लले सहितका अतिथिहरुले प्रदान गर्नु भएको छ । समापन खेल पूर्व आन्तरिक तथा कानुन मन्त्री प्रदेश सांसद हिक्तम कार्कीको प्रमुख आथित्यमा समापन भएको छ ।

त्यस्तै ,कमल गाउँपालिकाका फुटबल कोच रुस्तम राई, नवकिरण बाल क्लब लगायतलाई सम्मान गरिएको थियो । विजेता,उपविजेता खेलाडीहरुलाई प्रदेश सभा सदस्य तथा पूर्व आन्तरिक मामिला तथा कानून मन्त्री हिक्मत कुमार कार्की, कमल गाउँपालिकाकी अध्यक्ष मेनुका काफ्ले, उपाध्यक्ष बेनु शिवाकोटी, प्रमुख प्रशासकीय अधिकृत काजीमान राई लगायतले पुरस्कार प्रदान गरेका थिए ।

प्रतियोगिताको समापन समारोहका अवसरमा अग्रज खेलाडी बलबहादुर कार्कीलाई सम्मान गरिएको थियो । विगतमा केर्खा क्षेत्रमा उनले फुटबल खेलको विकासमा दिएको योगदानको कदर गर्दै सम्मान गरिएको हो । उनले केर्खा फुटबल क्लबसँगै झापा ११, बौद्ध फुटबल क्लबबाट समेत खेल खेलेका थिए ।

कार्यक्रम समितिका सचिव सूर्यप्रसाद न्यौपानेले सञ्चालन गरेका थिए । कमल गाउँपालिका ३ स्थित केर्खा खेलमैदानमा प्रतियोगिता सपम्पन्न भएको हो । गत फागुन २५ देखि शुरु भएको प्रदेशस्तरिय फूटवल प्रतियोगिता कमल गाउँपालिकाको खेलकुद विकास समितिले आयोजना गरेको हो ।

मैत्रीपूर्ण फुटबल खेलमा आयोजक विजयी 
प्रदेश स्तरीय प्रथम अध्यक्षकप फुटबल प्रतियोगिताको फाइनल खेल अघि आयोजक समेत रहेको कमल गाउँपालिका खेलकुद विकास समिति र कमल गाउँपालिका कर्मचारीबीच भएको मैत्रीपूर्ण खेलमा आयोजक समिति विजयी भएको छ । टाइब्रेकरमा ४–२ ले आयोजक समिति विजयी भएको हो । निर्धारित समयमा १–१ गोलको बराबरी भएपछि खेल टाइब्रेकरमा धकेलिएको थियो ।

कमल गाउँपालिका खेलकुद विकास समितिका सदस्य भुवानी प्रसाद थेवेको कप्तानीमा आयोजक समिति मैदानमा उत्रिएको थियो भने कमल गाउँपालिकाका प्रमुख प्रशासकीय अधिकृत काजिमान राईको कप्तानिमा कर्मचारी टिम सहभागि भएको थियो ।