झापा – झापाको कनकाई माईमा लाग्दै आएको माघे संक्रान्ती मेला यो वर्ष नलाग्ने भएको छ ।
शिवसताक्षी र कन्काई नगरपालिकाको सोमबार बसेको संयुक्त बैठकले पछिल्लो समय कोरोना संक्रमण थपिएको भन्दै माई मेला स्थगित गर्ने निर्णय गरेको हो।
दुबै पालिकाको संयुक्त बैठकले कनकाई नदीको पश्चिम तिर माइधार र पूर्व तिर कोटिहोम क्षेत्रमा माई मेला आयोजना नगर्ने निर्णय भएको शिवसताक्षी नगरका नगर प्रमुख चन्द्रकुमार शेर्माले जानकारी दिए।
मकर नुहाउन र मेला का लागि नेपाल तथा भारतका सयौँ तीर्थयात्री आउने भएकाले कोरोना संक्रमणको जोखिमलाई मध्य नजर गदैै यस वर्ष मेला नलगाउने निर्णय गरेको दुवै नगरपालिकाले जनाएका छन् ।
नेपालका विभिन्न धार्मिक महत्व बोकेका नदीमध्ये कन्काई माईको छुट्टै महत्व छ।
यो नदीमा हिन्दू धर्मावलम्बी भक्तजनद्वारा आस्थापूर्वक स्नान, पूजाआराधना गर्ने प्रचलन रहिआएको छ। आफ्नो मनोकांक्षा पूरा हुने जनविश्वास रहँदै आएको यो नदीमा माघे संग्रान्तीका दिन मकर नुहाउनेको घुइँचो नै लाग्ने गर्छ।
नेपालको पूर्वी क्षेत्रको अलावा पूर्वोत्तर भारतको दार्जीलिङ, सिक्किम, पश्चिम बङ्गाल र आसामका भक्तालु तथा दर्शनार्थीसमेत यहाँ आउने गरेका छन्।
Discussion about this post