दर्शक भेट्न हलमा ‘महाजात्रा’ टिम

काठमाडौँ । ‘जात्रा’ र ‘जात्रै जात्रा’ पछि षट्कोण आर्ट्सले निर्माण गरेको यस्तो तेस्रो भाग ‘महाजात्रा’ को बम्पर सुरुआत भएको छ । चैत ९ गतेदेखि नेपालसँगै विश्वभर एकसाथ प्रदर्शन भइरहेको फिल्म दर्शकको भिडभाड हलमा देखिएको छ ।

प्रदर्शनको पहिलो र दोस्रो दिन उपत्यका र मोफसलमा रहेका मल्टिप्लेक्समा प्राय शोहरू हाउसफुल छ । हलमा फिल्म हेरिरहेका दर्शकसँग साक्षात्कार गर्न निर्देशक प्रदीप भट्टराई, अभिनेता हरिवंश आचार्य, विपिन कार्की, रवीन्द्रसिंह बानियाँ, रवीन्द्र झा, वर्षा राउत लगायत पुगेका छन् । उनीहरुले दर्शकबाट शत प्रतिशत सकारात्मक ‘वर्ड अफ माउथ’ पाएका छन् ।

दर्शकबाट प्राप्त प्रतिक्रियाले आफूसहित टिमलाई हौसला मिलेको अभिनेता हरिवंश आचार्यले बताए । ‘नेपाली फिल्म चल्नु पर्छ । यो मनोरञ्जनसँगै भाषा र संस्कृतिसँग जोडिएको विषय हो । हलमा पुगेर दुई दिन नै प्रतिक्रिया लिदा सबैले तारिफ गर्नुभएको छ’, अभिनेता आचार्यले भने,‘मैले निर्वाह गरेको भूमिकाले नेताहरूलाई संदेश पनि दिएको छ । सच्चिने की सकिने ? भन्ने एउटा प्रश्न पनि मेरो पात्रले उठाएको छ ।’

अभिनेता आचार्यले आज होलीको दिन पनि विभिन्न हलमा पुगेर दर्शकसँग साक्षात्कार गर्ने तालिका रहेको बताए । प्राप्त शो र दर्शकबाट प्राप्त सकारात्मक ‘वर्ड अफ माउथ’ फिल्मले प्रदर्शनको पहिलो दिन एक करोड २३ लाखको ग्रस कलेक्सन गरेको छ । दोस्रो दिन शनिवार यो आकडामा राम्रै वृद्धि हुनेमा दुईमत छैन् । दर्शक प्रतिक्रिया लिईरहेका अभिनेता रवीन्द्रसिंह बानियाँले दर्शकले पहिलो हाफमा रहेको कमेडी र दोस्रो हाफमा रहेको राजनीतिक विषयलाई दर्शकले रुचाउनु भएको बताए ।

‘यसपटक फिल्मलाई मनोरञ्जनमा मात्र सिमित नराखी राष्ट्रिय विषयलाई उठाएका थियौँ । सोही कारण जात्राबाट यसपटक महाजात्रा भयो । दर्शकले दुवै पक्षलाई रुचाउनु भएको छ । हामी दर्शकबाट सफल भएका छौँ । उहाँहरूले नै फिल्म हेर्न सिफारिस गरिरहनु भएको छ’, अभिनेता बानियाँले भने,‘हामीले दर्शकबाट पाइरहेको आशिर्वादले हाम्रो १४ महिनाको दुखलाई भुलाएको छ ।

अभिनेता विपिन कार्कीले दर्शकले फिल्मका पात्रको सुखदुःखलाई पर्दा बाहिर पनि महसुश गरेको बताए । ‘मसँगै जोएश र मुन्नाको सुखदुःखमा दर्शक पनि उस्तै भावमा पाएँ । पात्रसँग दर्शकलाई जोड्न सक्नु हाम्रो सफलता हो । मलाई मुख्य अभिनेता बनाउने जात्रा शृङखला मेरा लागि सधैँ खास छ । यो फिल्म हेर्दा समय र पैसाको सदुपयोग हुन्छ भन्नेमा विश्वस्त हुन् दर्शकलाई आग्रह गर्दछु’, अभिनेता कार्कीले भने ।

फिल्म युनिट आइतबार पनि दिउसोको शोदेखि दर्शकसँग हलमा पुगेर भेटघाट गर्दैछ । दर्शकको चाँप बढ्नुका साथै सकारात्मक प्रतिक्रिया आएपछि प्रदर्शकले शो सङ्ख्या बढाएका छन् । आइतबारका दिवा शो देखि दर्शकको उपस्थिति बलियो देखिएको छ ।

आपतकालीन रुपमा आइपर्ने पैसा व्यवस्थापन गर्ने अवसर र त्यसले निम्त्याउने समस्यालाई रोचक शैलीमा प्रस्तुत गरिने ‘महाजात्रा’मा हरिवंश आचार्य, विपिन कार्की, रविन्द्रसिंह बानियाँ, वर्षा राउत, अर्जुनजंग शाही, प्रकाश घिमिरे, राजाराम पौडेल, प्रवीण खतिवडा, दिव्यदेव, सुमन कार्की, शिशिर बाङ्देल, गौमाया गुरुङ, अरविन खड्का लगायतको अभिनय रहेको छ । फिल्ममा म्याक्स दीपेश खत्री र यज्ञश्वर पौडेल निर्माता छन् ।