नबज्दा चुरा ती घरै शून्य हुन्छ
बजेका चुराले घरै पुण्य हुन्छ
चुरा शक्तिको स्रोत हो बुझ्नुपर्छ
सबैले सधैँ ती चुरा पुज्नुपर्छ ।
चुराले दुखेको हियो शान्त पार्छ
व्यथाका तरेली मजाले निखार्छ
चुराका कुरामा मीठो राग हुन्छ
चुरा छेउ छैनन् भने चित्त रुन्छ ।
चुरा नै छ संसार थाम्ने उराल्ने
सबै मर्दको माथ भुट्ने बराल्ने
चुरा शान्ति विद्रोहको चिन्ह मानौँ
चुरा जिन्दगीको सबै थोक ठानौँ ।
चुरामा लुकेको छ क्षेप्यास्त्र अस्त्र
यसैभित्र पाइन्छ सौन्दर्य शास्त्र
चुरा भोक तिर्खा सबै मेट्न सक्छ
चुराले करौती बनी रेट्न सक्छ ।
बजेका चुराभित्र सङ्गीत हुन्छ
चुरामा नदेख्ने मिठो प्रीत हुन्छ
चुरामा छ सर्वोच्चता भावगङ्गा
चुराले सधैँ देह पार्ने छ चङ्गा ।
✍️ बिन्दु दहाल मूकदर्शक
दमक, झापा ।
Discussion about this post