कारितास नेपालको आयोजनामा कमलमा चित्रकला प्रतियोगिता सम्पन्न (फोटो फिचर सहित)

विजयकुमार अधिकारी, कमल । कारितास नेपालले आफ्नो आयोजनामा कमल गाउँपालिका क्षेत्रका ७ ओटा विद्यालयहरूमा सञ्चालन हुँदै आएको विद्यालयमा आधारित विपत् जोखिम न्यूनीकरण परियोजनाको जम्मा ३ वर्षको अवधि समाप्त हुनै लाग्दा आज शुक्रबारका दिन कमल-२, स्थित श्री कमला मदनआश्रित स्मृति मा.वि., क्याम्पाको सभाहलमा कमल गाउँपालिका क्षेत्र भित्रका सामुदायिक तथा संस्थागत विद्यालयहरूको बिचमा प्राथमिक तह (कक्षा १-५) स्तरीय चित्रकला प्रतियोगिता सम्पन्न गरेको छ ।

हामी र हाम्रो सुन्दर विद्यालय विषयको उक्त चित्रकला प्रतियोगितामा जम्मा २४ ओटा विद्यालयहरूले भाग लिएका थिए । उक्त प्रतियोगिताको प्रथम स्थानमा श्री मंगलमय माध्यमिक विद्यालय, कमल-५, पाडाजुँगीमा सुस्त श्रवणतर्फ कक्षा-३ मा अध्ययनरत छात्र प्रविन राई, त्यसैगरी द्वितीय स्थानमा श्री निहारिका इङ्लिस बोर्डिङ सेकेन्डरी स्कुल, कमल-३, केर्खामा कक्षा-४ मा अध्ययनरत छात्र दिवस लिम्बू र तृतीय स्थानमा श्री पाथीभरा इङ्लिस बोर्डिङ स्कुल, कमल-२, क्याम्पामा कक्षा-५ मा अध्ययनरत छात्र मौसम श्रेष्ठ भएका छन् ।

कार्यक्रममा कारितास नेपालका प्रतिनिधि देवको अध्यक्षता तथा कमल गाउँपालिकाका उपाध्यक्ष प्रमिला न्यौपाने तिवारीको प्रमुख आतिथ्यमा सञ्चालित चित्रकलाको नतिजा प्रकाशन तथा पुरस्कार वितरण कार्यक्रममा कमल गाउँपालिका युवा, खेलकुद तथा शिक्षा शाखा प्रमुख सूर्यप्रसाद न्यौपाने, कमला मदनआश्रित स्मृति मा.वि.को विद्यालय व्यवस्थापन समितिका अध्यक्ष डिल्लीराम अधिकारी, प्रधानाध्यापक हिमप्रसाद दाहाल तथा शिक्षक दुर्गाप्रसाद पराजुली, महेन्द्र रत्न मा.वि., कमल-२, समयगढका शिक्षक विजयकुमार अधिकारी लगायतको उपस्थिति रहेको थियो ।

कार्यक्रममा प्रमुख अतिथि प्रमिला न्यौपाने तिवारीले चित्रकला प्रतियोगितामा उत्कृष्ट स्थान प्राप्त गर्ने विद्यार्थीहरू तथा सम्बन्धित विद्यालयहरूलाई हार्दिक बधाई प्रकट गर्नुभएको थियो भने सहभागी सबैलाई हार्दिक धन्यवाद व्यक्त गर्नुभएको थियो । त्यसै गरी मन्तव्यको क्रममा कमल गाउँपालिका युवा, खेलकुद तथा शिक्षा शाखा प्रमुख सूर्यप्रसाद न्यौपानेले चित्रकारी सीपको महत्त्वमाथि प्रकाश पार्दै कारितास नेपालले प्रतियोगिता सञ्चालन गरेकामा उक्त कार्यको हार्दिक सराहना गर्नुभयो ।

प्रतियोगितामा उत्कृष्टता हासिल गर्ने विद्यार्थीहरूलाई पुस्कार स्वरूप ब्याग तथा प्रमाणपत्र र सम्बन्धित विद्यालयहरूलाई ट्रफी तथा प्रमाणपत्र वितरण गरिएको थियो ।