झापाको गौरादहमा फुटसल मैदानको उद्घाटन

गौरादह – झापाको गौरादहमा फुटसल मैदानको उद्घाटन गरिएको छ । गौरादह नगरपालिकाको वडा नं. १ को माउण्ट स्कुल जाने बाटोमा निर्माण भएको फुटसल मैदानको शनिबार एक कार्यक्रमकाबीच गौरादह नगरपालिकाका नगर प्रमुख रोहित कुमार शाहले उद्घाटन गर्नु भएको छ ।

सपोर्ट हब गौरादहले संचालनमा ल्याएको फुटसल करिब अढाइ कट्ठा क्षेत्रफलमा छ । अत्याधुनिक कार्पेट र अन्य सामग्री समेटेर बनाइएको स्थानमा फुटबल खेल्न खेलाडीलाई कुनै कठिनाइ नहुने हबका व्यवस्थापकीय प्रमुख अर्जुन खड्काले जानकारी दिनुभयो । उहाँका अनुसार फुटसलको संरचना सम्पन्न गर्न करिब ७० लाख रुपैयाँ खर्च गरिएको छ । फाइभ साइड क्षमताको फुटसलमा प्रति खेलको प्रतिब्यक्ति न्युनतम ६५ रुपैयाँ देखि अधिकतम १ सय रुपैयाँ लाग्ने सञ्चालक खड्काले जानकारी दिएका छन् । यस्तै, ५/५ जना खेलाडीबिच २५/२५ मिनेटको समयमा खेलिन्छ । उक्त मैदानमा एक घण्टा खेल खेले बापत १ हजार देखि १ हजार ३ सय शुल्क निर्धारण गरिएको छ । जहाँ बाथरुम र चेन्जींग रुम लगायतको सुविधा पनि रहेको छ ।

पछिल्लो समय युवापुस्ता माझ फुटसल आकर्षण खेल बनेको छ । फुटबलका पारखीहरुको हुटहुटीलाई मध्यनजर गर्दै दक्षिणी झापाको गौरादहमा पनि फुटसल सञ्चालनमा ल्याइएको छ ।

गौरादह फुटसलका सञ्चालक अर्जुन खड्काको सभापतित्वमा भएको कार्यक्रममा सञ्चालक सन्तोष बिष्टले स्वागत मन्तब्य गर्नु भएको थियो ।