अपराजित रहदै महिला भलिबल टोली फाइनलमा

काठमाडौं । एभीसी सेन्ट्रल जोन भलिबल प्रतियोगिताको समूह चरणको अन्तिम खेलमा पनि नेपाली महिला टोली विजयी भएको छ ।

ढाकामा सोमबार राउण्ड रोबिनको अन्तिम खेलमा किर्गिस्तानलाई ३-० को सोझो सेटमा हराउँदै नेपालले लगातार पाँचौं जित निकालेको हो ।

नेपालले किर्गिस्तानमाथि २५-८,२५-१४ र २५-१७ को सेटमा जित निकालेको हो । यस जितसँगै नेपालले शीर्ष स्थानमा रहदै फाइनलमा स्थान बनाएको छ । नेपालले ५ खेलमा १४ अंक जोडेको छ ।

अब नेपालले उपाधिका लागि उज्वेकिस्तानसँग मंगलबार खेल्नेछ । नेपालले यसअघि श्रीलङ्का, बङ्गलादेश, माल्दिभ्स र उज्वेकिस्तानलाई हराएको थियो ।

प्रतियोगितामा साविक विजेता नेपालसहित आयोजक बंगलादेश, श्रीलंका, माल्दिभ्स, उज्वेकिस्तान र किर्गिस्तान गरी ६ टोलीको सहभागिता थियो ।

आज उज्वेकिस्तानले श्रीलङ्कालाई हराएर फाइनलमा नेपालसँगको भेट पक्का गरेको हो । नेपाली महिला टोली अपराजित रहँदै फाइलनमा पुगेको छ ।