१३ जेष्ठ २०८२,काठमाडौँ ।
- महाप्रतिवाद राष्ट्रिय साप्ताहिकद्वारा सञ्चालित पत्रकारिता तालिम बैशाख २२ गतेदेखि सुरु भई जेष्ठ १० गतेसम्म सञ्चालन भई सफलतापूर्वक सम्पन्न भएको छ । अनलाइन माध्यमबाट सञ्चालन गरिएको उक्त तालिममा नेपालका विभिन्न क्षेत्रहरू र युएईबाट गरी कुल ६ जना प्रशिक्षार्थीको सहभागिता रहेको थियो ।
नेपाली पत्रकारितामा २६ वर्षभन्दा लामो अनुभव राख्ने महाप्रतिवाद साप्ताहिकका प्रकाशक तथा प्रधान सम्पादक तारा लामिछाने (गिदोन) तालिमको प्रमुख प्रशिक्षक थिए ।
जेष्ठ १२ गते सम्पन्न दीक्षान्त समारोहको सञ्चालन महाप्रतिवादकी कार्यकारी सम्पादक अनिता रसाइलीले गरिन् ।
समारोहमा नेपाल पत्रकार महासंघ युएई शाखाका पूर्व अध्यक्ष तथा जनप्रगतिशील मञ्च युएईका अध्यक्ष लक्ष्मण खनाल, कास्की आदर्श समाज युएईका प्रमुख सल्लाहकार शिव कुमार श्रेष्ठ, सूचना चौतारी डटकमका प्रमुख दिपेश श्रेष्ठ र महाप्रतिवादका प्रधान सम्पादक तारा लामिछाने अतिथिका रूपमा सहभागी थिए ।
समारोहको सभाध्यक्ष युएई समाचारदाता कृष्ण कुँवर कर्नेलियस थिए ।
तालिममा सहभागी प्रशिक्षार्थीहरूमा अशोक चौधरी (कञ्चनपुर), देवनारायण मण्डल (सुनसरी), सुजन सुनार (तनहुँ), टेक बहादुर कुँवर (पर्वत), विवश लामिछाने (धरान) र यामबहादुर श्रीराम रानाभाट (युएई) थिए ।
प्रशिक्षार्थीहरूले तीन-तीन मिनेटको अनुभव प्रस्तुत गरेपछि कार्यक्रममार्फत प्रमाणपत्र वितरण गरिएको थियो । समारोहमा अतिथि मन्तव्य क्रमशः दिपेश श्रेष्ठ, लक्ष्मण खनाल, शिव कुमार श्रेष्ठ र अनिल के घिसिङले दिएका थिए ।
स्वागत मन्तव्य फोटो पत्रकार शुक्रान्त राईले दिएका थिए भने कार्यक्रमको समापन सभाध्यक्ष कृष्ण कुँवर कर्नेलियसले गरेका थिए ।
तालिमले नयाँ पत्रकारहरूमा व्यावसायिकता, सीप र प्रेरणा थप्ने उद्देश्य पूरा गरेको आयोजकले जनाएको छ ।
Discussion about this post