- ९ जेस्ठ २०८२काठमाडौं।
विश्वको सर्वोच्च शिखर सगरमाथाको चुचुरोमा नेपाली पत्रकारिताको एउटा गौरवपूर्ण क्षण कोरिएको छ।
आइतबार विहान ८:५२ बजे, अनुभवी पर्वतारोही विजय घिमिरेले चौथो पटक सगरमाथाको सफल आरोहण गर्दै ‘महाप्रतिवाद’ राष्ट्रिय साप्ताहिक पत्रिका र त्यसका प्रकाशक तथा प्रधान सम्पादक गिदोन लामिछाने (तारा) को तस्बिर चुचुरोमा पुऱ्याएका छन्।
- सिधा सम्पर्कमार्फत् हिमालमै रहँदै जानकारी दिँदै घिमिरेले भने, “महाप्रतिवाद जस्तो पत्रिका, जसले सदैव आवाजविहीनहरूको पक्षमा निडर कलम चलाउँदै आएको छ, त्यसका प्रधान सम्पादक ताराको तस्बिर सगरमाथाको चुचुरोमा फहराउन पाउँदा म अत्यन्तै गर्वित र भावुक भएको छु।”
पत्रिकाको सामाजिक र वैचारिक प्रतिबद्धतालाई सम्मान गर्दै सगरमाथामा तस्बिर पु-याउनु आफ्नो व्यक्तिगत सन्तुष्टि र सन्देश भएको उनी बताउँछन्।
घिमिरेको यो कदमले पत्रकारिता र सामाजिक सेवाबीचको सम्बन्धलाई विश्वकै सर्वोच्च स्थानबाट पुष्टि गरेको छ।
अर्कोतर्फ, यो समाचारले प्रधान सम्पादक तारा लामगादेलाई गहिरो भावनाले छोएको छ।
उनले भने, “मैले सगरमाथा चढ्न सकिन, तर मेरो तस्बिर र मेरो आवाज विश्वको सर्वोच्च शिखरमा पुग्यो–यो केवल व्यक्तिगत सम्मान होइन, ‘महाप्रतिवाद’ले प्रतिनिधित्व गर्ने आवाजविहीन समुदायको पहिचान हो।
म अत्यन्त गदगद छु र विजय घिमिरे ज्यूलाई हृदयदेखि आभार प्रकट गर्न चाहन्छु।”हाल विजय घिमिरे र उनको टोली सुरक्षित रुपमा फर्कने क्रममा छन्।
पत्रकारिताको मुल मर्मलाई सम्मान गर्ने यो कार्यले सगरमाथाको हिमालझै उचाइमा पुगेर सामाजिक न्याय र समानताको सन्देश बोकेको छ। यो केवल आरोहण होइन -एक विचार, एक आवाज, र एक मिसनको शिखर विजय हो उनले भनेका छ्न ।
Discussion about this post