प्रतिगामी तत्वहरु बिरुद्द एकजुट हुने समाजवादी मोर्चाको ठहर ।,

१ चैत्र ३०८१काठमाडौं ।

नेकपा माओवादी केन्द्र नेतृत्वको विपक्षी चार दलीय समाजवादी मोर्चाको बैठक बोलाईएको छ  ।प्रतिगामी तत्वहरु सलबलाईरहेको अवस्थालाई मध्यनजर गर्दै समाजबादी बैठक बोलाईएको हो ।

नेकपा माओवादी केन्द्र, नेकपा एकीकृत समाजवादी (नेकपा एस), विप्लव नेतृत्वको नेकपा, र नेपाल समाजवादी पार्टी (नेसपा) सम्मिलित मोर्चाको बैठक दिउँसो ३ बजे नेकपा एसको पार्टी कार्यालय, आलोकनगरमा बस्ने गरी बोलाइएको हो ।

मोर्चाको कार्यदल सदस्य तथा नेसपाका सहअध्यक्ष गंगानारायण श्रेष्ठका अनुसार बैठक आगामी चैत १५ गते काठमाडौंमा आयोजना हुने विरोध सभाको तयारीलाई लिएर बोलाइएको हो ।

यसअघि चैत ९ गते जनकपुरमा गर्न प्रस्तावित विरोध सभा स्थगित भएको थियो । श्रेष्ठका अनुसार, विरोध सभाको तयारीलाई प्रभावकारी बनाउन जनकपुरको सभा रोकिएको हो ।

मोर्चाले चैत २ गते बिहान बौद्धिक वर्गसँग अन्तक्रिया आयोजना गर्नेछ भने सोही दिन दिउँसो १ बजे पत्रकार सम्मेलन गर्नेछ ।

फागुन २७ गते सम्पन्न मोर्चाको बैठकले वर्तमान सरकारका कारण सडकमा राजावादी शक्तिहरू सक्रिय भएको ठहर गर्दै प्रतिगामी शक्तिहरूलाई काठमाडौंमै चुनौती दिन विरोध सभा गर्ने निर्णय गरेको थियो ।

फागुन २५ गते त्रिभुवन अन्तर्राष्ट्रिय विमानस्थलमा पूर्वराजा ज्ञानेन्द्र शाहको स्वागतमा राजावादी समर्थकहरूको उपस्थिति व्यवस्थामाथि चुनौतीको रूपमा मोर्चाले व्याख्या गरेको छ ।

यसै सन्दर्भमा मोर्चाका नेताहरूले प्रतिगामी र प्रतिक्रियावादी शक्तिहरूको षड्यन्त्रलाई परास्त गर्न लाखौँ जनता सडकमा उतार्ने चेतावनी दिएका छन् ।

अहिलेको सत्तारूढ गठबन्धन भ्रष्टाचार र बिचौलियाहरूको संरक्षणमा लागेको आरोप लगाउँदै मोर्चाका नेताहरूले जनतामा निराशा र असन्तोष बढेको दाबी गरेका छन् ।

इतिहासमा पराजित तत्वहरूले अवसर खोजिरहेको भन्दै उनीहरूले गणतन्त्रको रक्षा र सुदृढीकरणका लागि संघर्ष गर्नुपर्ने आवश्यकता औंल्याएका छन् ।

नेकपामाओवादी केन्द्रका अध्यक्ष पुष्पकमल दाहाल ‘प्रचण्ड’ ले संघीय लोकतान्त्रिक गणतन्त्रलाई सुरक्षित राख्न आफ्नो पार्टी प्रतिबद्ध रहेको बताउँदै, परिवर्तनकारी शक्तिहरू र जनतालाई साथ लिएर संघर्ष गर्न तयार रहेको बताएका छन् ।

नेकपा एकीकृत समाजवादी (नेकपा एस) ले आज आन्दोलनको कार्यक्रम घोषणा गर्दै छ ।

पार्टी संगठन सुदृढीकरण र प्रतिगामी शक्तिहरूका पछिल्ला गतिविधिविरुद्ध भन्दै नेकपा एसले आन्दोलनका कार्यक्रम घोषणा गर्न लागेको हो ।

नेकपा एसले मुलुकको पछिल्लो राजनीतिक अवस्थाबारे जानकारी दिन आज विशेष पत्रकार सम्मेलन आयोजना गरेको छ ।

पार्टी अध्यक्ष माधवकुमार नेपालसहित शीर्ष नेताहरूको उपस्थितिमा विशेष कार्यक्रमसमेत घोषणा गर्ने पार्टी प्रचार विभागले जनाएको छ ।