कमलमा ट्याक्टर र थेसरको मूल्य निर्धारण

दमक । झापाको कमल गाउँपालिकामा कृषि प्रयोजनमा लागि प्रयोग हुने ट्याक्टरको मनपरी ढङ्गबाट रकम असुल्ने प्रवृत्ति बढेपछि त्यसमा एकरूपता ल्याउन र किसानलाई ठगिनबाट रोक्नका लागि दररेट निर्धारण गरेको छ । झापामा नै पहिलो पटक पालिकाले किसानले जोताइमा प्रयोग गर्दाको दररेट तोकेको हो ।

गाउँपालिकाका अध्यक्ष हुकुमसिं राईका अनुसार रोडाभेटरबाट जो जोतेबापत किसानले प्रतिघण्टा दुई हजार तिर्नु पर्नेछ । यसभन्दा अघि २५ सय रुपियाँसम्म ट्याक्टरहरूले असुल्दै आएका थिए । टयाक्टरहरुले मनपरी रूपमा किसानबाट रकम असुल्दा पनि स्थानीय सरकारको चासो नगएको भन्दै विरोध हुँदै आएको थियो ।

यसैगरी कल्टिभेटरबाट जोताइगर्दा प्रतिघण्टा १५ सयमात्र तोकिएको छ । यो मूल्य निर्धारण नहुँदा किसानबाट दुई हजारभन्दा बढी रकम ट्याक्टर सञ्चालकहरूले लिँदै आएका थिए । बारम्बार इन्धनको भाउ बढेको भन्दै किसानबाट बढी रकम ट्याक्टर सञ्चालकहरूले लिने गरेको पाइएको थियो ।

धान झार्दा थ्रेसर प्रयोग गर्दा २० टिनको १ टिन किसानले दिनुपर्नेछ । यसभन्दा अघि १५ टिनको १ टिन किसानले दिनुपर्ने अवस्था थियो । किसानले पछिल्लो समयमा राँगागोरुको प्रयोग गर्न छाडेपछि ट्याक्टरमा नै निर्भर रहनु परेको छ । ट्याक्टरले बढी मूल्य लिँदा उत्पादनमा लागत मूल्य बढ्ने गर्थ्यो ।

पालिका अध्यक्ष राईका अनुसार तोकिएको मूल्य भन्दा बढी लिएको अवस्थामा किसानबाट गुनासो आउनसाथ आवश्यक कारबाही गरिने छ । ‘‘हामीले लामो छलफल र वैज्ञानिक रूपमा मूल्य निर्धारण गरेका हौँ’’, उनले भने, ‘‘यसको पालना सबैले गर्नुपर्छ र नगरे कारबाही भोग्न तयार हुनुपर्छ ।’’