प्याप्सन दमकले गर्यो ई.सि.ए. प्रोग्राम-२०८० को सम्पूर्ण तयारी पूरा

दमक, २१ भदौ । झापामा रहेको निजी तथा आवासीय विद्यालय अर्गनाइजेसन नेपाल (प्याप्सन) दमकले ई.सि.ए. प्रोग्राम-२०८० को सम्पूर्ण तयारी पूरा गरेको छ ।

आज विहिबार दमकमा पत्रकार सम्मेलन गर्दै यही भदौ २३ गते शनिबार झापाको दमक-४ स्थित एकता ऐकाडेमीमा कार्यक्रमको आयोजना हुने भएको छ । उक्त पालिका स्तरीय तहगत अतिरिक्त क्रियाकलाप कार्यक्रम अन्तर्गत कक्षा १ देखि ८ सम्म हाजिरीजवाफ प्रतियोगिता, कक्षा १ देखि १० सम्म चित्रकला प्रतियोगिता, आधारभूत तह (८ सम्म) श्रुतिलेखन प्रतियोगिता, आधारभूत तह (८ सम्म) निबन्ध लेखन प्रतियोगिता, माध्यमिक तह (१० सम्म) वक्तृत्वकला प्रतियोगिता आयोजना हुने भएको छ ।

प्रतियोगितामा सहभागि विद्यार्थीको अनिवार्य परिचयपत्र हुनुपर्ने तथा फर्जी विद्यार्थी सहभागि गराएको पाईए प्याव्सनको नियम अनुसार त्यस्ता विद्यालयलाई कारवाही गरिने इसीए कार्यक्रम संयोजक तथा प्याप्सन दमकका उपाध्यक्ष मित्र खत्रीले बताएका छन् ।

सो कार्यक्रममा प्याव्सन दमकमा आवद्ध ४६ वटा विद्यालयहरुको सहभागिता रहनेछ । दमक नगरपालिकाकी उपप्रमुख रेगिना भट्टराईको प्रमुख आतिथ्यतामा हुने सो कार्यक्रममा दमक नगरपालिकाका शिक्षा संयोजक कुवेर भट्टराई,शिक्षा शाखाका प्रतिनिधि, विद्यालयका प्रतिनिधिहरु लगायतको उपस्थितिमा विजयी विद्यार्थीहरुलाई ट्रफि तथा प्रमाणपत्र प्रदान गरि पुरस्कृत गरिने जनाईएको छ ।

प्रतियोगिताका उत्कृष्ठ छात्रासहित २ ,२ जना प्रतियोगिहरु २९ भदौमा हुने प्याव्सन जिल्लास्तरिय इसीए प्रतियोगितामा सहभागिता जनाउने पाउने प्याव्सन दमकका कोषाध्यक्ष सुर्य कटुवालले बताएका छन् । प्याव्सनले जिल्लाको १५ वटै पालिकामा इसीएसहित सांस्कृतिक कार्यक्रम र खेलकुद प्रतियोगिता आफनो बार्षिक कार्यक्रमका रुपमा आयोजना गरिआएको छ ।

पत्रकार सम्मेलनमा प्याव्सन दमकका सदस्यहरु खड्गबहादुर बुढाथोकी, लक्ष्मी नेपाल, प्रविण पाठक लगायतको उपस्थिति रहेको थियो ।