आन्द्रामा एजेरुको उपचार गराइरहेका कोमलप्रसादद्धारा सहयोगको याचना

दमक, १७ असार–आन्द्रामा देखिएको समस्याले पीडित झापाको दमक–८ का कोमलप्रसाद नेपाल घर भित्रै थलिएका छन् । पछिल्लो अढाई तीन महिनाबीचको समयमा ४० वर्षिय नेपालले आफ्नो प्राण बचाईदिन आग्रहका साथ सहयोगको याचना गरेका छन् ।

दैनिक श्रम गरी जीवन यापन गरिरहेका नेपालले स्वास्थ्य उपचारको निम्ति आफ्नै वल तागतले रकमको जोहो गरेका थिए । तर, उपचारको समय लामो रहने डाक्टरले सल्लाह दिएपछि आन्द्रामा एजेरु बोकेर उनी सञ्चार माध्यममा आइपुगेका छन् ।

हाम्रोसरोकारसंगको भेटमा पीडित नेपालले विरामी भएको आफ्नो विगतको समयलाई सम्झे । उनलाई पाँच महिना अघि वेहोस अवस्थामा परिवारले दमकस्थित दमक अस्पतालमा पुर्याइएको थियो.। त्यहाँ उनको केही समय उपचारपछि परिवारले दमकस्थित आम्दा अस्पतालमा पुर्याएका थिए । आम्दामा आइसियुमा उपचार भएको र सोही क्रममा दमकस्थित निम्स अस्पतालमा सिटी-स्कान गर्दा आन्द्रामा समस्या देखिएपछि धुलिखेल मेडिकल कलेजमा रेफर गरिदिएको नेपालले हाम्रोसरोकारलाई बताए ।

दमकदेखि विभिन्न अस्पतालको बसाईले आफ्नो समाथ्र्यले नथाम्नेगरी खर्च भइसकेको र धुलिखेल मेडिकल कलेजमा अझ बढी रकम खर्च भएपछि आगामी समयकको लागि आफ्नो सामाथ्र्य नभएको भन्दै नेपालले आफनो जीवन बचाइदिन आग्रह गरेका हुन् । नेपालले भने–’आफूसंग भएको डेढ लाख बढी खर्च भएको र आफ्ना आफन्तहरुबाट सरसापटी गरेर ल्याएको गरी जम्मा रु ७ लाख बढी रकम अहिलेसम्म उपचारमा खर्च भइसकेको छ ।’ हाल, नियमिति औषधी खानुपर्ने्र नियमित फलोअपको निम्ति अस्पताल जानुपर्ने आर्थिक कठिनाई भएको भन्दै पीडित नेपालले सहयोगको याचना गरेका छन् ।

दुई सन्तानका बुबा कोमलप्रसाद नेपालका आमा र श्रीमती छन् । सामाजिक कार्यमा सक्रिय रहने नेपालले आफ्नो यस्तो हालतमा सहयोगको आशा र अपेक्षा राखेको हाम्रोसरोकारसंगको भेटमा बताए ।

नेपालले भने–‘बिरामी नहुँदाको अवस्थामा जे काम भेटेँ त्यही गर्दै परिवार पाँच जनाको परिवार पाल्दै आएको थिएँ । तर, कमाउने मान्छे आफै थला परेपछि मेरो र परिवारकै बिचल्ली हुने अवस्था आयो ।’

पीडित नेपालले उपचार सहयोगका लागि मनकारी दाताहरुलाई सहयोगको याचना गरेका हुन् । सहयोग गर्न इच्छुकले उनलाई ९८२७९७९९८३ नम्बरमा सम्पर्क गरी सानिमा बैंकको दमक शाखामा उनकै नाममा खोलिएको खाता नम्बर ००२०११०६०००६०४५ मा सहयोग रकम जम्मा गर्न सकिने छ ।