कमल । झापाको कमलमा रहेको कमलनगर जेसीजको सातौँ पद हस्तान्तरण तथा पुरस्कार वितरण समारोह कमल-५, पाडाजुङी स्थित रोडस्टार पार्टी होटलमा सम्पन्न भएको छ ।
जेसीज वर्ष २०२२ का अध्यक्ष जेसी नारायण बस्नेतको अध्यक्षता, प्रदेश नं. १ का मुख्यमन्त्री माननीय हिक्मतकुमार कार्कीको प्रमुख आतिथ्य तथा कमल गाउँपालिकाका उपाध्यक्ष प्रमिला न्यौपाने तिवारीको विशिष्ट आतिथ्यमा सञ्चालित उक्त समारोहमा राष्ट्रिय गायिका टीका प्रसाईँलाई सम्मान-पत्रद्वारा तथा उहाँको साङ्गीतिक व्यक्तित्व वृत्तचित्र प्रोजेक्टरमार्फत प्रस्तुत गरी विशेष सम्मान गरिएको थियो भने उहाँको गायन प्रस्तुति समेत रहेको थियो ।
कार्यक्रममा जेसीज वर्ष २०२२ का अध्यक्ष जेसी नारायण बस्नेतले जेसीज वर्ष २०२३ का अध्यक्ष जेसी रिजु कार्कीलाई पद हस्तान्तरण गर्नुभएको थियो । पद हस्तान्तरणको बेला जेसी रिजु कार्कीको जीवनी वृत्तचित्र प्रोजेक्टर मार्फत आकर्षक ढङ्गमा प्रस्तुत गरिएको थियो । कार्यक्रममा कमलनगर जेसीज वर्ष २०२३ का अध्यक्ष रिजु कार्की, महासचिव हरि अधिकारी लगायत सबै पदाधिकारीहरूले शपथ ग्रहण गर्नुभएको थियो । उक्त समारोहमा कमलनगर जेसीजका निवर्तमान पदाधिकारीहरू तथा सामाजिक व्यक्तित्वहरूलाई सम्मान-पत्रद्वारा सम्मान गरिएको थियो ।
प्रमुख अतिथिको आसनबाट बोल्नुहुँदै माननीय हिक्मतकुमार कार्कीले युवाहरूलाई नेतृत्व विकासको अवसर प्रदान गर्ने जेसीजको उद्देश्य सराहनीय रहेको बताउँदै लागुपदार्थ दुर्व्यसन विरुद्धका चेतनामूलक कार्यहरू सञ्चालन गर्ने कुरामा कमलनगर जेसीज लगायत सबै जेसीजहरूको ध्यान जानु जरुरी रहेको विचार व्यक्त गर्नुभयो ।
कार्यक्रममा शैक्षिक व्यक्तित्व विजयकुमार अधिकारी लगायतलाई समेत सम्मान-पत्रद्वारा सम्मान गरिएको थियो । कार्यक्रममा आमन्त्रित व्यक्तित्वहरूलाई आकर्षक मायाको चिनो प्रदान गरिएको थियो भने समारोहमा उपस्थित सम्पूर्ण व्यक्तिहरूको निम्ति भोजनको समेत व्यवस्था गरिएको थियो ।
कार्यक्रममा वडा नं. १, ३, ४, ५ र ६ का वडाअध्यक्षहरू क्रमशः केदार कटुवाल, अग्निप्रसाद कोइराला, चन्द्रप्रसाद भट्टराई, लालबहादुर बिष्ट र नरेन्द्र भट्टराई, कमल गाउँपालिका शिक्षा शाखा प्रमुख सूर्यप्रसाद न्यौपाने, नेपाल शिक्षक महासङ्घ कमल गाउँसमितिका अध्यक्ष हिमप्रसाद दाहाल, मंगलमय मा. वि. पाडाजुँगीका प्रधानाध्यापक मोहनकुमार बगाले, कमल गाउँपालिका महिला तथा बालबालिका शाखा प्रमुख रेनुका गौतम, सामाजिक व्यक्तित्वहरू राजनबहादुर ढुङ्गाना, मित्रदेव काफ्ले, शिक्षकहरू ओमप्रकाश गौतम, मधुसुदन अधिकारी, अर्जुन श्रेष्ठ, रीतादेवी खतिवडा, हजेन्द्र बस्नेत लगायतको उपस्थिति रहेको थियो ।
Discussion about this post