धान खेतमा हात्ती मृत फेला

झापा – झापाको कचनकवलमा आज एउटा हात्ती मृत फेला परेको छ । चारकोशे जलथल जंगलदेखि दुई किलोमिटर दक्षिण कचनकवल गाउँपालिका- १ स्थित घेरावारि निवासी गङ्गा दाहालको धान खेतमा वयस्क भाले हात्ती मृत अवस्थामा फेला परेको जिल्ला प्रहरी कार्यालय झापाले जनाएको छ ।

मृत फेला परेको हात्तीको दाह्रा नरहेको कचनकवल–१ का वडा अध्यक्ष महावीर लिम्बू रञ्जितले जानकारी दिए । हात्तीको शरीरमा चोटपटक नदेखिए पनि दाह्रा छैन,’ उनले भने ,’ हात्तीको पेट सुन्निएको छ । दाह्रा पनि छैन।’

डिभिजन वन कार्यालयको टोली आएर पोस्टमार्टम गरिरहेको र त्यसपछि खाल्डो खनेर अन्त्येष्टि गरिने उनले बताए । यसअघि पनि जलथल जंगलमा हात्ती मृत फेला परेको थियो ।

सो जंगलमा एक दर्जन बढि हात्ती बस्दै आएका छन् । हात्ती नियन्त्रणका लागि सौर्य विद्युती तारबार लगाइए पनि सो जंगलबाट हात्ती गाउँघर पसेर क्षति पाउँदा स्थानीय त्रसित छन् ।