नेपाल सरकार स्वास्थ्य बिमा बोर्डको नयाँ योजना ,बिमितले पाउनेछन २ लाख सम्मको स्वास्थ्य उपचार ।

२५ असार २०८२ काठमाडौं।

गम्भीर रोग लागेका नागरिकलाई आर्थिक राहत पुर्‍याउने उद्देश्यले सरकारले स्वास्थ्य बीमा कार्यक्रमअन्तर्गत ८ प्रकारका रोगको उपचारमा २ लाख रुपैयाँसम्मको सुविधा प्रदान गर्ने व्यवस्था गरेको छ।

स्वास्थ्य बीमा बोर्डका अनुसार अब क्यान्सर, मुटु रोग, मृगौला समस्या, हेड इन्जुरी (टाउकोको गम्भीर चोट), स्पाइनल इन्जुरी (मेरुदण्डको चोट), सिकलसेल एनिमिया, पार्किन्सोनिजम र अल्जाइमर रोग भएका बीमितले यो सुविधा प्राप्त गर्न सक्नेछन्।

स्वास्थ्य तथा जनसंख्या मन्त्री प्रदिप पौडेलका अनुसार “हामीले विगतमा जनतालाई गरेको प्रतिबद्धतालाई कार्यान्वयन गर्दै गम्भीर रोग लागेका व्यक्तिलाई उपचारमा सहयोग पुगोस् भनेर यो विशेष व्यवस्था ल्याएका छौं।

स्वास्थ्य बीमा अब सचेत, जिम्मेवार र जनमुखी बन्नेछ। सबै नेपालीलाई गुणस्तरीय स्वास्थ्य सेवा सुनिश्चित गर्न यो केवल सुरुवात हो।”

उनले बीमाको पहुँचलाई ग्रामीण तथा विपन्न समुदायसम्म विस्तार गर्नुपर्नेमा जोड दिँदै आम नागरिकको सुझावलाई स्वागत गर्ने बताए।

सरकारले स्वास्थ्य बीमालाई थप प्रभावकारी, पारदर्शी र दिगो बनाउँदै लैजाने योजना अघि सारेको छ।