अमेरिकाको ४७ औं रास्ट्रपतिको रुपमा डोनाल्ट ट्र्म ।

२६ कार्तिक २०८१
अमेरिकामा डोनाल्ड जोन ट्रम्प संयुक्त राज्य अमेरिकाका ४७ औं राष्ट्रपतिमा निर्वाचित भएका छन् । २०२५ जनवरी २० बाट तिनले दोस्रो पटक राष्ट्रपतीय पदभार सम्हाल्ने छन् । यसअगि २०१७-२०२१ सम्म तिनले ४५ औं राष्ट्रपतिको रूपमा देशको सेवा गरेका थिए ।

ट्रम्पको जन्म १९४६ जुन १४ मा अमेरिकाको न्युयोर्क सहरस्थित एउटा अस्पतालमा भएको थियो । परिवारमा जन्मेका पाँच सन्तानमध्ये तिनी काहिँला थिए । परिचित व्यापारी, टेलिभिजन व्यक्तित्व र द ट्रम्प अर्गनाइजेसन नामक संस्थाका मुख्य व्यक्तिसमेत रहेका तिनी धार्मिक दृष्टिकोणबाट ख्रिस्टियन हुन् ।

ख्रिस्टियन परिवारमा जन्मेर ख्रिस्टियन परिवारमा नै हुर्केका ट्रम्प बाल्यकालमा मन्डलीमा जान्थे र बाल सङ्गतिमा उपस्थित हुन्थे । पास्टर नर्मन भिन्सेन्ट पिलले तिनका परिवारलाई सेवा दिने गर्थे । आफ्नो मृत्यु नभएसम्म पास्टरले ट्रम्पलाई सरसल्लाह दिँदै आत्मिक वातावरणमा हुर्काउने काम गरे ।
ख्रिस्टाब्द २०११ मा लिइएको एउटा अन्तर्वार्तामा ट्रम्पले भनेका थिए, “म प्रोटेस्टेन्ट हुँ। … तपा इंहरूलाई थाहै छ कि विगतका वर्षहरूमा मन्डलीसित मेरो राम्रो सम्बन्ध रहेको छ ।
मेरा विचारमा धर्म एउटा राम्रो कुरो हो । मेरा विचारमा मेरो धर्म एउटा राम्रो धर्म हो।” ट्रम्पका अनुसार तिनी न्युयोर्कस्थित चर्चमा जानुका साथै प्रभुभोजमा सहभागी हुन्छन् ।

ट्रम्पले केही पुस्तक पनि प्रकाशित गरेका छन् । सहलेखकको रूपमा लिखित आफ्नो कृति ट्रम्पः द आर्ट अफ द डिललाई तिनले आफूलाई मनपर्ने दोस्रो पुस्तक भनेका छन् । तिनको मनपर्ने पहिलो पुस्तक चाहिँ बाइबल हो । तिनले भनेका छन्, “के तपाइंहरूलाई थाहा छ [मलाई मनपर्ने] पहिलो पुस्तक चाहिँ कुन हो ? बाइबल । कुनैले पनि बाइबललाई पराजित गर्न सक्दैन ।”

परिचित इभान्जलिकल प्रोटेस्टेन्ट अगुवाहरूसित ट्रम्पको राम्रो सम्बन्ध रहेको छ । चुनावको प्रचारप्रसारको दौडानमा तिनले पास्टरहरूबाट आशिष् थापेका थिए । चुनावी प्रचारप्रसारको क्रममा तिनको असफल हत्याको प्रयाससमेत भएको थियो । तिनलाई लक्षित गरी गोली प्रहार गरिए तापनि तिनी बाँच्न सफल भएका थिए ।

ट्रम्पका अनुसार परमेश्वरले विशेष कारणका निम्ति तिनको जीवन जोगाउनुभएको थियो, “एउटा कारणका लागि परमेश्वरले मेरो जीवन जोगाउनुभयो र त्यो कारण हो- हाम्रा देशलाई बचाउनु ।”

आफ्ना प्रतिद्वन्द्वी कमला ह्यारिसलाई पराजित गरी ट्रम्प अमेरिकाका ४७ औं राष्ट्रपति बनेका छन् । ७८ वर्षीय ट्रम्प राष्ट्रपतीय पदमा निर्वाचित हुने सबैभन्दा पाका र सबैभन्दा धनी मानिस हुन् । फोर्ब्स पत्रिकाको अनुमानअनुसार तिनी झन्डै ९ खरब नेपाली रुपियाँका मालिक हुन् ।