बिधुत प्राधिकरणका कुलमानको निश्कासन प्रति प्रचण्डको आक्रोश, सरकारको निर्णय आपत्तिजनक ।

१२ चैत्र २०८१काठमाडौं /

नेपाल विद्युत प्राधिकरणका कार्यकारी निर्देशक कुलमान घिसिङको निस्काशन प्रकरणमा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले कडा आपत्ति जनाएका छन्।

सामाजिक सञ्जाल फेसबुकमार्फत उनले सरकारको निर्णयलाई ‘गलत र आपत्तिजनक’ भन्दै आलोचना गरेका छन्।

प्रचण्डले लेखेका छन्, “देशमा जनताले चरम लोडसेडिङको सामना गरिरहेका बेला मेरो नेतृत्वको सरकारले उर्जा विज्ञका रूपमा कुलमान घिसिङलाई विद्युत प्राधिकरणको कार्यकारी निर्देशकमा नियुक्त गरेको थियो।

उनको विज्ञता, क्षमता र हाम्रो सरकारको संयुक्त प्रयासले उज्यालो नेपाल निर्माण सम्भव भएको थियो।

घिसिङले विद्युत प्राधिकरणको बाँकी बक्यौता उठाउनुपर्ने कुरामा जोड दिएका कारण लामो समयदेखि सरकारले पटक-पटक स्पष्टीकरण सोधेर अन्याय गरिरहेको आरोप लगाए।

प्रचण्डले थप लेखेका छन्, “आज भने मन्त्रिपरिषद् बैठकबाट कुलमानलाई निष्कासन  गरेको भन्ने खबर सञ्चारमाध्यमबाट थाहा लागेको छ।

आशा गरौं, यो खबर असत्य साबित होस्। यदि सत्य रहेछ भने सरकारको यो कदम पूर्ण रूपमा गलत र आपत्तिजनक छ।

दुई तिहाइ बहुमतको दम्भमा गरिएको यो निर्णयको घोर निन्दा गर्दछु।”

घिसिङको निष्कासन प्रकरणलाई लिएर विभिन्न राजनीतिक दलका नेताहरू र सर्वसाधारणले सामाजिक सञ्जालमा असन्तुष्टि व्यक्त गरिरहेका छन्।