प्याब्सन दमकद्धारा ई.सि.ए. प्रोग्राम-२०८० कार्यक्रम सम्पन्न

दमक, २३ भदौ । झापामा रहेको निजी तथा आवासीय विद्यालय अर्गनाइजेसन नेपाल (प्याब्सन) दमकले ई.सि.ए. प्रोग्राम-२०८० कार्यक्रम सम्पन्न गरेको छ ।

आज भदौ २३ गते शनिबार झापाको दमक-४ स्थित एकता ऐकाडेमीमा उक्त कार्यक्रमको आयोजना गरिएको थियो। कार्यक्रमको अध्यक्षता प्याब्सन दमक नगरका अध्यक्ष जर्नादन मैनालीले गर्नुभएको थियो । यस्तै कार्यक्रमको प्रमुख अतिथिमा दमक नगरपालिकाका उपप्रमुख रेगिना भट्टराई (प्रसार्ईँ) रहनुभएको थियो भने विशेष अतिथिमा दमक नगरका शिक्षा संयोजक तथा दमक नगरपालिका वडा नं. ९ का वडाध्यक्ष कुवेर भट्टराई, प्याब्सन कोशी प्रदेशका सचिव कोषराज प्याकुरेल, प्याब्सन झापाका पूर्व वरिष्ठ उपाध्यक्ष सर्वणकुमार पोख्रेल लगायत विभिन्न विद्यालयको शिक्षकहरुको उपस्थिति रहेको थियो ।

उक्त पालिका स्तरीय तहगत अतिरिक्त क्रियाकलाप कार्यक्रम अन्तर्गत कक्षा १ देखि ५ सम्म हाजिरीजवाफ प्रतियोगितामा प्रथममा चुलाचुली बोडिङ्ग स्कूल, दमक नेशनल स्कूल, पाथीभरा बोडिङ्ग स्कूल, द्धितीयमा एलाइड स्कूल, इस्टन स्टार बोडिङ्ग स्कूल, सप्तशी एकाडेमी र सर्वोदय बोडिङ्ग स्कूल र तृतीयमा ग्लोबल बोडिङ्ग स्कूल, नेपाल जापान स्कूल भएको छ । यस्तै कविता प्रतियोगितामा छात्रा तर्फ प्रथम हुनेमा इस्टन स्टार बोडिङ्ग स्कूल, द्धितीयमा एलाइट स्कूल र तृतीयमा ग्लोबल बोडिङ्ग स्कूल र ड्रिमल्याड बोडिङ्ग स्कूल भएको छ । त्यस्तै छात्र कविता प्रतियोगिता तर्फ प्रथम हुनेमा सर्वोदय बोडिङ्ग स्कूल, द्धितीयमा पाथीभरा बोडिङ्ग स्कूल, इन्सपायर स्कूल र तृतीयमा मेची बोडिङ्ग स्कूल भएको इसीए कार्यक्रम संयोजक तथा प्याब्सन दमकका उपाध्यक्ष मित्र खत्रीले बताएका छन् ।

त्यस्तै मिस्टर एन्ड मिस वर्ल्ड हेरिटेजअन्तर्गत मिस्टर हेरिटेज तर्फको उपाधि विजेता प्याब्सन दमकका सदस्य प्रविण पाठकलाई समेत सम्मान गरिएको छ ।

सो कार्यक्रममा प्याब्सन दमकमा आवद्ध ४६ वटा विद्यालयहरुको सहभागिता रहेको थियो । उक्त कार्यक्रमको सञ्चालन प्याब्सन दमकका सचिव नविन योगीले गरेका थिए ।