हाम्रो अवस्था (कविता)

सधैँ घुक्क गर्दै दुखी नित्य रुन्छन्
जतै भ्रष्ट अन्यायका शैल हुन्छन्
यिनैले सके देशको यो व्यवस्था
सडेको मुलाझैँ छ हाम्रो अवस्था ।

कतै न्याय माग्नेहरूमाथि हान्छन्
यहीँ गोरुलाई भनी गौ बखान्छन्
सधैँ हुन्छ यस्तै सबै चुप्प बस्दा
सडेको मुलाझैँ छ हाम्रो अवस्था ।

रमाएर हामी सधैँ बाघ पाल्छौँ
त्यसै स्वर्ण हीरा लगी घाट फाल्छौँ
चुसी जीर्ण खोक्रो बनाए व्यवस्था
सडेको मुलाझैँ छ हाम्रो अवस्था ।

जता दाम राम्रो त्यतै हुन्छ काम
तिनैले सबै ध्वस्त पार्छ्न् तमाम
जराकाण्ड खाए सके यो व्यवस्था
सडेको मुलाझैँ छ हाम्रो अवस्था ।

युवा ताँत लाग्छन् सबै जान पारि
यता गाउँमा हुन्छ जाली सवारी
सबै ढाँट पल्के सके यो व्यवस्था
सडेको मुलाझैँ छ हाम्रो अवस्था ।