झापाको कमल-४ बन्यो गाउँपालिकाकै पहिलो बालमैत्री वडा (फोटो फिचर सहित)

कमल । झापाको कमल गाउँपालिका वडा नम्वर ४ ले वडालाई वालमैत्री स्थानीय शासनयुक्त वडा घोषणा गरेको छ । बालमैत्री गाउँपालिका घोषणा गर्नका लागी आवश्यक पर्ने ५१ वटा सुचक मध्ये वडा नम्वर ४ ले सबै सुचक पुरा गरेपछि आज एक कार्यक्रमका बिच वडालाई पालिकाकै पहिलो बालमैत्री वडा घोषणा गरिएको हो ।

कमल गाउँपालिका कार्यपालिकाको २०७७ साल फागुन १२ गते बसेको बैठकको निर्णय अनुसार “खुशी राखौँ बालबालिकाको मुहार, बालमैत्री कमल समृद्धिको आधार” भन्ने नाराका साथ २०७८ साल फागुन मसान्त भित्र गाउँपालिकालाई वालमैत्री स्थानीय शासनयुक्त स्थानीय तहका रुपमा घोषणा गर्न हरेक वडाले प्रतिवद्धता जनाएका थिए । सबै सुचक पुरा भएकालको सोमबार वडा नम्बर ४ लाई पालिकाको पहिलो वालमैत्री स्थानिय शासनयुक्त वडा घोषणा गरिएको हो । एक कार्यक्रमका बिच गाउँपालिकाकी अध्यक्ष मेनुका काफ्लेले वडा नम्बर ४ लाई बालमैत्री वडा घोषणा गर्नुभएको हो ।

सबैभन्दा पहिले बालमैत्री घोषणा गर्ने वडालाई गाउँपालिकाको विकास बजेट बाट १० लाख रुपैया समेत प्रदान गरिएको छ । सो रकम बालबालिकाको बृत्ती बिकासमा खर्च गरिने ४ नम्बर वडाका वडाध्यक्ष प्रेमबहादुर राईले जानकारी दिनुभयो ।

बालमैत्री वडा घोषणा कार्यक्रममा बिहाबारी २० बर्ष पारी भन्ने सन्देश सहितको नाटक समेत प्रस्तुत गरिएको थियो । कार्यक्रम सुरु हुनु अघि बिभिन्न विद्यालयका बिद्यार्थीहरु र्याली सहित कार्यक्रमस्थलमा आएका थिए । वडाध्यक्ष प्रेमबहादुर राईको अध्यक्षतामा कार्यक्रम सम्पन्न भएको थियो ।