दमक गट ट्यालेन्ट सिनियर एन्ड जुनियर डान्स कम्पिटिसनको उपाधि लिजा र निलमलाई

दमक – झापाको दमकमा आयोजित ‘दमक गट ट्यालेन्ट सिनियर एन्ड जुनियर डान्स कम्पिटिसन’ को फाइनल सम्पन्न भएको छ । दमकस्थित जागृति डान्स स्टुडियोले आयोजना गरेको प्रतियोगिताको सिनियरतर्फ लिजा मगर र जुनियरतर्फ निलम राईले प्रथम स्थान हासिल गर्दै उपाधि जित्नुभएको छ । दमकस्थित सूर्योदय बोर्डिङ स्कुलमा आयोजित फाइनल प्रतियोगितामा दुवै उमेर समूहका प्रतिभाशाली प्रतियोगीहरूले आफ्नो नृत्य कला प्रस्तुत गरेका थिए । प्रतियोगिताले स्थानीय स्तरमा रहेका बालबालिका तथा युवाको नृत्य प्रतिभा पहिचान गर्नुका साथै उनीहरूलाई आफ्नो क्षमता प्रदर्शन गर्ने अवसर प्रदान गरेको छ । फाइनल कार्यक्रम प्याब्सन दमक नगर कमिटीका सचिव लक्ष्मी नेपालको प्रमुख आतिथ्यता तथा हिमशिखर टेलिभिजनका समाचार प्रमुख सुदिप अधिकारीको विशिष्ट आतिथ्यतामा सम्पन्न भएको थियो । प्रतियोगिताको सिनियरतर्फ लिजा मगर प्रथम, मिङहाङ लिम्बू दोस्रो, डेनी मगर तेस्रो, रचना राई चौथो र साईना लावती पाँचौँ हुनुभएको छ । उत्कृष्ट प्रदर्शन गर्दै प्रथम हुनुभएकी लिजा मगरले नगद २० हजार रुपैयाँसहित ट्रफी र मेडल प्राप्त गर्नुभयो । दोस्रो हुनुभएका मिङहाङ लिम्बूले नगद १५ हजार रुपैयाँ, ट्रफी र मेडल प्राप्त गर्दा तेस्रो हुनुभएका डेनी मगरले नगद १० हजार रुपैयाँसहित ट्रफी र मेडल प्राप्त गर्नुभयो । यस्तै, चौथो स्थान हासिल गर्नुभएकी रचना राई र पाँचौँ हुनुभएकी साईना लावतीले ट्रफी तथा मेडल प्राप्त गर्नुभयो । यसैगरी, जुनियरतर्फ निलम राई प्रथम, युनेश लिम्बू दोस्रो, आरोही बास्तोला तेस्रो, जेम्स राई चौथो र चेरेस्बी लिम्बू पाँचौँ हुनुभएको छ । जुनियरतर्फ प्रथम हुनुभएकी निलम राईले नगद १५ हजार रुपैयाँसहित ट्रफी र मेडल प्राप्त गर्नुभयो । दोस्रो हुनुभएका युनेश लिम्बूले नगद १० हजार रुपैयाँ, ट्रफी र मेडल प्राप्त गर्दा तेस्रो हुनुभएकी आरोही बास्तोलाले नगद ५ हजार रुपैयाँसहित ट्रफी र मेडल प्राप्त गर्नुभयो । चौथो स्थानमा रहनुभएका जेम्स राई र पाँचौँ हुनुभएकी चेरेस्बी लिम्बूले पनि ट्रफी तथा मेडल प्राप्त गर्नुभयो । प्रतियोगिताको फाइनल चरणमा जुनियरतर्फ आठ जना र सिनियरतर्फ १६ जना गरी कुल २४ जना प्रतियोगीले प्रतिस्पर्धा गरेका थिए । विभिन्न चरण पार गर्दै फाइनलमा पुगेका प्रतियोगीहरूले आफ्नो नृत्य कौशल, प्रस्तुति र प्रतिभामार्फत दर्शकको ध्यान आकर्षित गरेका थिए । नृत्यमा रुचि राख्ने बालबालिका तथा युवालाई आफ्नो प्रतिभा प्रस्तुत गर्ने मञ्च उपलब्ध गराउने उद्देश्यले प्रतियोगिता आयोजना गरिएको आयोजक जागृति डान्स स्टुडियो दमकका सञ्चालक तथा कार्यक्रम संयोजक विजय राईले जानकारी दिनुभयो । यस्ता प्रतियोगिताले नयाँ प्रतिभाको पहिचान र विकास गर्न सहयोग पुर्‍याउनुका साथै बालबालिका तथा युवामा आत्मविश्वास अभिवृद्धि गर्न र कला क्षेत्रप्रति आकर्षण बढाउन महत्त्वपूर्ण भूमिका खेल्ने अपेक्षा गरिएको छ । स्थानीय स्तरमा लुकेर रहेका प्रतिभालाई अवसर प्रदान गर्दै नृत्य तथा मनोरञ्जनको क्षेत्रमा नयाँ सम्भावना खोज्न प्रतियोगिता उपयोगी बनेको आयोजकको विश्वास छ ।