शिक्षकहरूका लागि सूचना तथा सञ्चार प्रविधि प्रशिक्षक प्रशिक्षण समापन समाराेह सम्पन्न

विजयकुमार अधिकारी, कमल, ७ साउन : प्रविधिमैत्री शिक्षक समाज नेपाल जिल्ला समन्वय समिति झापाको आयोजना तथा कमल गाउँपालिका, कनकाई नगरपालिका, बिर्तामोड नगरपालिका, गौरीगन्ज गाउँपालिका, भद्रपुर नगरपालिका र शिवसताक्षी नगरपालिकाको प्रायोजनमा क्रमबद्ध रूपमा शिक्षकहरूका लागि सहभागीहरूको भौतिक तथा भर्च्युअल दुवै प्रकारको उपस्थितिमा बिर्तामोड नगरपालिका, कनकाई नगरपालिका, गौरीगन्ज गाउँपालिका आदि स्थानहरूमा सञ्चालित सूचना तथा सञ्चार प्रविधि प्रशिक्षक प्रशिक्षण IT MTOT ८० घन्टे कार्यशालाको समापन समारोह आज कमल-२, क्याम्पास्थित श्री कमला मदनआश्रित स्मृति मा.वि. को सभाहलमा सम्पन्न भएको छ ।

गत जेठ ५ गतेदेखि सञ्चालित उक्त कार्यशालाबाट तीन दर्जन बढी शिक्षकहरूले तालिम प्राप्त गर्नुभएको छ । कमल गाउँपालिकाकी उपाध्यक्ष प्रमिला न्यौपाने तिवारीको प्रमुख आतिथ्य, प्रविधिमैत्री शिक्षक समाज नेपालका केन्द्रीय अध्यक्ष भूपति बस्यालको विशेष आतिथ्य तथा प्रविधिमैत्री शिक्षक समाज नेपाल जिल्ला समन्वय समिति झापाका अध्यक्ष टीका सुवेदीको अध्यक्षतामा सञ्चालित आजको प्रशिक्षण समापन कार्यक्रममा कमल गाउँपालिकाकी उपाध्यक्ष प्रमिला न्यौपाने तिवारीले प्रमुख अतिथिको मन्तव्य, भूपति बस्यालले विशेष अतिथिको मन्तव्य तथा टीका सुवेदीले सभाध्यक्षको मन्तव्य प्रकट गर्नुभएको थियो ।

त्यसै गरी एसटीएफटी प्रदेश नं. १ का अध्यक्ष बालकुमार रेग्मी, एसटीएफटी केन्द्रीय प्राविधिक समिति संयोजक घनश्याम अधिकारी, कमल गाउँपालिका शिक्षा शाखाका प्रा.स. रबिन गौतम, नेल्टा झापाका संयोजक धर्मेन्द्र भट्टराई, कमला मदनआश्रित स्मृति मा.वि. कमल-२ का प्रधानाध्यापक हिमप्रसाद दाहाल, शहीद धर्मभक्त मा.वि. कमल-३ का प्रधानाध्यापक मधुसुदन अधिकारी, नरेन्द्रजनता मा.वि. कमल-१ का प्रधानाध्यापक बद्री कार्की लगायतले मन्तव्य प्रकट गर्नुभएको थियो भने प्रेम कटुवाल, .गीता गुरुङ, कर्मा शेर्पा, खेम लिम्बू, महेन्द्र राई, डिकबहादुर लिम्बू, प्रकाश दाहाल लगायतले विषयगत प्रविधियुक्त प्रस्तुतीकरण गर्नुभएको थियो ।

उक्त समारोहमा एसटीएफटी झापाकी उपाध्यक्ष मैया दाहालले स्वागत मन्तव्य प्रकट गर्नुभएको थियो भने कार्यक्रमको सञ्चालन एसटीएफटी झापाका सचिव तिलक गजमेरले गर्नुभएको थियो ।