दमकमा रोजगार मेला सम्पन्न

दमक – झापाको दमकमा दमक उद्योग बाणिज्य संघले आयोजना गरेको रोजगार मेला सम्पन्न भएको छ । हिजो (विहिबार) दमकस्थित कस्मिक पार्टी प्यालेसमा आयोजित मेलाको उद्घाटन दमक नगर प्रमुख रामकुमार थापाले गरेका थिए । नगर प्रमुख थापाले निजी क्षेत्रसँगको सहकार्यमा स्थानीय सरकारले धेरै कामहरु गर्न चाहेको बताए ।

त्यस्तै, उपप्रमुख रेगिना भट्टराईले दमकमा स्थानीय उत्पादित बस्तुहरुको बजारीकरणमा यसले ठुलो मद्धत पुगेको बताइन् । उनले दमकमा नगरपालिकाले कोशेली घर सञ्चालनमा ल्याएर स्थानीय उत्पादनहरुको प्रवद्र्धन गर्ने लक्ष्य राखिएको बताइन् । उनले प्राविधिक शिक्षा अहिलेको आवश्यकता भएको पनि उल्लेख गरिन् ।

दमक उद्योग वाणिज्य संघका अध्यक्ष गोपाल गुरागाइँको अध्यक्षतामा भएको सो कार्यक्रममा नेपाल उद्योग वाणिज्य महासंघका केन्द्रिय सदस्य गोकूल श्रेष्ठले पनि शुभकामना मन्तव्य राखेका थिए ।

कार्यक्रम संघका वरिष्ठ उपाध्यक्ष राजु खडकाको संयोजकत्वमा र प्रथम उपाध्यक्ष राजकुमार योङयाको सञ्चालनमा सम्पन्न भएको थियो । मेलामा विभिन्न स्कूल तथा कलेजका तीन सय बढी विद्यार्थी, रोजगारीको खोजीमा रहेका युवाहरु, सेवा तथा रोजगार प्रदायक उद्योग, प्रतिष्ठानका प्रतिनिधिहरुको समेत उपस्थिति रहेको थियो ।