कमल, २७ माघ । १३औँ राष्ट्रपति रनिङ सिल्डअन्तर्गत कमल गाउँपालिका स्तरीय त्रिदिवसीय खेलकुद प्रतियाेगिता उद्घाटन समाराेह कमल गाउँपालिकाका अध्यक्ष हुकुमसिंह राईकाे अध्यक्षता तथा प्रदेश नं. १ का माननीय मुख्यमन्त्री हिक्मतकुमार कार्कीकाे प्रमुख आतिथ्यमा आज माघ २७ गते शुक्रबारका दिन कमल-५ स्थित आदिवासी रङ्गशालामा भव्य रूपमा सम्पन्न भएकाे छ ।
कमल गाउँपालिका युवा, खेलकुद तथा शिक्षा शाखाकाे आयाेजनामा सञ्चालित उक्त कार्यक्रममा कमल गाउँपालिका शिक्षा प्रमुख अतिथिले झापा जिल्लाका भलिबल रेफरी राेशन दाहाललाई नयाँ भलिबल हस्तान्तरण गरी खेलकुद प्रतियाेगिताकाे उद्घाटन गर्नुभएकाे थियाे ।
उक्त समाराेहमा कमल-१ का वडाअध्यक्ष केदार कटुवाल, शहीद धर्मभक्त मा. वि. काे विद्यालय व्यवस्थापन समितिका अध्यक्ष लेखनाथ खतिवडा लगायतले शुभकामना मन्तव्य प्रकट गर्नुभएकाे थियाे भने खेलकुद प्रतियाेगिताका सचिव एवम् मंगलमय मा. वि. का प्रधानाध्यापक माेहनकुमार बगालेले स्वागत मन्तव्य राख्नुभएकाे थियाे ।
प्रमुख अतिथिकाे आसनबाट माननीय मुख्यमन्त्री हिक्मतकुमार कार्कीले खेलकुदबाट शारीरिक र मानसिक स्वास्थ मात्र मजबुत हुने नभई यसले व्यक्तिलाई कुलत र विकृतिबाट बचाई असल नागरिक बन्न सहायता पुर्याउने भएकाे हुँदा खेलकुद क्षेत्रकाे विकास अपरिहार्य हुने विचार व्यक्त गर्नुभयाे । कार्यक्रमकाे सञ्चालन कमल गाउँपालिकाका युवा, खेलकुद तथा शिक्षा शाखाका प्रा.स. रबिन गाैतमले गर्नुभएकाे थियाे ।
कार्यक्रममा कमल गाउँपालिकाकी उपाध्यक्ष प्रमिला न्याैपाने तिवारी, कमल गाउँपालिका युवा, खेलकुद तथा शिक्षा शाखा प्रमुख सूर्यप्रसाद न्याैपाने, कमल गाउँपालिकाअन्तर्गतका विभिन्न वडाका वडाअध्यक्षहरू, विभिन्न विद्यालयका वि.व्य.स. अध्यक्षहरू, प्रधानाध्यापकहरू तथा शिक्षकहरू, पत्रकारहरू, विभिन्न विद्यालयका विद्यार्थीहरू लगायतकाे उपस्थिति रहेकाे थियाे ।
कार्यक्रममा मंगलमय मा. वि. काे नृत्य समूहले स्वागत नृत्य प्रस्तुत गरेकाे थियाे भने कमला मदनआश्रित स्मृति मा. वि. का एनसीसी क्याडेट्सले आकर्षक प्रदर्शनी गरेका थिए ।
खेलकुदकाे पहिलाे दिन आज छात्र र छात्रा दुवैतर्फका १०० मि, २०० मि., ४०० मि. ८०० मि. र १,५०० मि. दाैड, सटपुट, ज्याभलिन थ्राे, सटपुट, कबड्डी र भलिबल खेलहरू सञ्चालन भएका थिए । उक्त खेलकुद प्रतियाेगिता माघ २९ गतेसम्म सञ्चालन हुनेछ ।
Discussion about this post