दमक । दमक-३, बेलडाँगीस्थित ड्रुक साङाक थार्पालिङ सार्वजनिक बौद्ध गुम्बा पुनर्निर्माण भएसँगै विधिवत उद्घाटन हुने भएको छ ।
पुनर्वास रोजेर अमेरिका, अष्ट्रेलिया, क्यानडा, डेनमार्क, न्युजील्याण्डलगायत विभिन्न मुलुकमा पुगेका भुटानी शरणार्थी समुदायको आर्थिक सहयोगबाट गुम्बा पुनर्निर्माणको काम सकिएको गुम्बाका अध्यक्ष एवम् आर्थिक समिति संयोजक राजमान गुरुङले जानकारी दिएका हुन् ।
यो ऐतिहासिक बौद्ध शक्तिपिठ गुम्बा करिव ४५ लाख रुपैयाँको लागतमा गुम्वाको निर्माण सम्पन्न भएको अध्यक्ष गुरुङले वताउनुभयो ।
आगामी नोभेम्बर १५ देखि १७ तारिक (कार्तिक २९ देखि मंसिर १ गते) सम्म विधिवत पूजा गरेर गुम्बाको उद्घाटन गरिने जानकारी दिँदै गुम्बा समितिले सोमबार पत्रकार मञ्च दमकको सभाहलमा पत्रकार भेटघाट आयोजना गरेको थियो ।
यस गुम्बा भुटानी शरणार्थी समुदायले सन् १९९७ मा स्थापना गरेका हुन् । त्यो बेला बाँसको भाँटाले बारेर बनाइएको गुम्बा कालान्तरमा पुनर्वास कार्यक्रमसँगै मानिसहरुको चहलपहल कम भएर जिर्ण बन्दै गयो । त्यसैले यसको पुनर्निर्माण आवश्यक ठानेर हाल भुटानी कौशल प्रयोग गरेर बनाइएको छ ।
बौद्ध धर्मावलम्बी शरणार्थी समुदायका लागि यो गुम्बा पवित्र शक्तिपिठ हो । त्यसैले यसको विधिवत उद्घाटन पूजा ल्हाबाब दुछेन अर्थात बुद्धको अवतरण भएको दिनमै गरिने गुरुङको भनाइ छ ।
सिक्किमस्थित देउराली गुम्बाका अवतारी बौद्ध लामा छोगत्रुल कुन्जाङ तेन्पाई ग्याल्छेनबाट गुम्बा उद्घाटन गर्ने कार्यक्रम तय गरिएको छ भने देवराली गुम्बा सिक्किमका छोगत्रुल कुन्जाङ तेनपाई ग्याल्त्सेन रिन्पोछेद्धारा वाङ अभिषेक ग्रहण गर्ने र पोखराका खेम्पो श्री लामा (थुप्तेन हिसे)बाट प्रवचन गर्ने कार्यक्रम रहेको आयोजकले जानकारी दिएको छ ।
ड्रुक साङाक थार्पालिङ सावैजनिक बौद्ध गुम्बा पुनर्निर्माण समिति, आमा समूह र लामा गुरूजनले तीन दिने कार्यक्रममा आम सहभागिताका लागि आह्वान समेत गरेका छन् ।
Discussion about this post